?

Log in

No account? Create an account

sobor_voronezh


О Соборе Воронежских святых


Previous Entry Share Next Entry
Служба преподобному Сергию (Сребрянскому), архимандриту Тверскому, исповеднику (+1948)
sobor_voronezh
Месяца марта в 23-й день.
СЛУЖБА
Преподобному Сергию исповеднику, архимандриту
НА ВЕЛИЦЕЙ ВЕЧЕРНИ.
Блажен муж: 1-й антифон.
На Г
осподи воззвах: стихиры на 8, глас 3:
Днесь собрашася вкупе православных множества, / во еже прославити предивнаго исповедника Сергия, / земли Воронежския преславное прозябение. / Иже подвиги своими небесе достиже, / и прилежно ныне молится Христу Богу, / о еже даровати всем верно воспевающим Христа, / прегрешений оставление // мир и велию милость.
Христу неустаннаго служителя, / превеликаго Митрофана соименника, / преподобного исповедника Сергия, / преславное торжество воспевающе, / ныне прилежанию добродетели научаемся. / Сей бо великий чудотворец / сохрани неврежденно залог, ему от Бога дарованный, / научает нас такожде благодать Христову в себе сохраняти, / и сим стезю спасительную со тщанием прохождати, / во еже получити от Христа Бога: / прегрешений оставление // мир и велию милость.
Милосердия чуднаго проповедника, / преподобномученицы Елисаветы претихаго наставника, / стража неусыпнаго дивныя обители Марфы и Марии, / преблаженнаго отца нашего Сергия, / воспевающе, прославим сице: / О великий наставниче народа христианскаго, / дивно тобою восприятый дар любви Христовы, / помози и нам верным чадом твоим стяжати, / и от Спасителя всех Бога восприяти: / прегрешений оставление // мир и велию милость.
Ины стихиры, глас 8:
Приидите верных множества, / восхвалити по достоянию чуднаго светильника, / лика преподобных сотрудника и праведных, / Сергия богомудраго и прехвальнаго. / Сей бо неложно исповесть Христа пред человецы, / и бысть глашатай истиннаго упования. / Егоже взирающе на скочание жительства, / подражающе вере его, // дерзновенно исповемы Христа Бога в мире сем.
Придите православнии людие, / воспоим великое подвигов множество / преподобнаго и богоноснаго отца нашего Сергия. / Предивно во иерейстем чине послужившаго, / и образ прилежания о пастве нам оставившаго, / в супружестве честном пожившаго, / и претихую красоту того нам явившаго, / монашеское поприще восприимшаго, / и до последняго издыхания безукоризнинно оное соблюдшаго. / Сей бо молит ныне Подвигоположника Христа: // о еже ниспослати нам мир и велию милость.
Приидите православных воинов полцы, / прославим неустанного вашего молитвенника, / преподобнаго Сергия исповедника. / Сей бо восприял еси в душе своей оный глас Господень: / больше сея любве никтоже имать, / да кто душу свою положит за други своя. / Сего ради душу свою многажды полагал еси за вои православныя, / оне же видяще таковую в ти ревность по Бозе, / со всяким тщанием провождаша своя ратныя труды, / за веру и Отечество живот свой полагающи. / Ныне же мы, воспевающе твоя чудныя подвиги, взываем сице: / буди предстательством твоим / воинству нашему утверждение, // и на враги крепкое одоление.
Слава, глас 4:
Взем на рамо свое Крест Господень, / шествовал еси непорочно за Христом Богом, / отвергнувши до конца гордыню с ея родоночальником диаволом, / испил еси до конца чашу страданий Господних / купно с новомученики и исповедники Российскими, / юже Сын Человеческий обеща сыновом Зеведеовым / и крещением обетованным с оными крестился еси, / и столп веры крепкий явился еси. / Непрестай нас поминати верных чад твоих // Сергие богомудре и треблаженне отче наш.
И ныне, глас той же: Иже Тебе ради...
Вход. Прокимен дне. И чтения.
Притчей чтение (главы 10, 3 и 8):
Память праведнаго с похвалами,/ и благословение Господне на главе его./ Блажен человек, иже обрете премудрость,/ и смертен, иже уведе разум./ Лучше бо сию куповати,/ нежели злата и сребра сокровища./ Честнейшая же есть камений многоценных,/ все же честное недостойно ея есть./ Долгота бо дней и лета живота в деснице ея,/ в шуйце же ея богатство и слава./ От уст ея исходит правда,/ закон же и милость на языце носит./ Послушайте убо мене, о чада,/ честная бо реку,/ и блажен человек, иже пути моя сохранит./ Исходи бо мои - исходи живота,/ и уготовляется хотение от Господа./ Сего ради молю вас/ и предлагаю мой глас сыновом человеческим:/ яко аз, премудрость, устроих совет,/ и разум и смысл аз призвах./ Мой совет и утверждение,/ мой разум, моя же крепость./ Аз мене любящия люблю,/ ищущии же мене обрящут благодать./ Разумейте убо, незлобивии, коварство,/ ненаказаннии же, прилагайте сердца./ Послушайте мене и паки,/ честная бо реку,/ и отверзу от устен правая,/ яко истине поучится гортань мой,/ мерзки же предо мною устны лживыя./ С правдою вси глаголы уст моих,/ ничтоже в них стропотно, ниже развращенно./ Вся права суть разумевающим/ и проста обретающим разум./ Научу бо вас истине,/ да будет о Господе надежда ваша,/ и исполнитеся Духа.
Премудрости Соломоновы чтение (главы 10, 6, 8 и 9):
Уста праведнаго каплют премудрость: устне же мужей мудрых ведят благодать./ Уста мудрых поучатся премудрости, правда же избавляет их от смерти./ Скончавшуся мужу праведну, не погибнет надежда./ Сын бо праведен раждается в живот и во благих своих плод правды обымет./ Свет праведным всегда, и от Господа обрящут благодать и славу./ Язык мудрых добрая свесть, и в сердце их почиет мудрость./ Любит Господь преподобная сердца, приятни же Ему вси непорочнии в пути./ Мудрость Господня просвещает лице разумнаго./ Постигает бо желающия ю, прежде даже разумети ю, и удобь узрится от любящих ю./ Утреневавый к ней не утрудится, и бдяй ея ради вскоре без печали будет./ Яко достойных ея сама обходит, ищущи, и во стезях ея является им благоприемне./ Мудрости никогдаже одолеет злоба./ Сих ради и рачитель бых доброты ея, и возлюбих ю, и поисках от юности моея./ И взысках невесту привести себе, яко всех Владыка возлюби ю./ Таинница бо есть Божия хитрости, и обретательница дел Его./ Труды ея суть добродетели: целомудрию же и разуму та учит, правде и мужеству,/ ихже потребнее ничтоже есть в житии человеком./ Аще же и многаго искусства желает кто, весть древняя, и быти хотящая разсмотрит./ Свесть извития словес и разрешения гаданий, знамения и чудеса проразумеет, и сбытия времен и лет;/ и всем советник есть благ, яко безсмертие есть в ней и благославие во общении словес ея./ Сего ради беседовах ко Господу, и помолихся Ему, и рех от всего сердца моего:/ Боже отцев и Господи милости, сотворивый вся словом Твоим/ и мудростию Твоею устроивый человека, да владеет бывшими от Тебе тварьми и да управляет мир в преподобии и правде./ Даждь ми Твоих Престолов приседящую премудрость и не отлучи мене от отрок Твоих, яко аз раб Твой и сын рабыни Твоея./ Посли ю с Небес от святаго жилища Твоего, и от Престола славы Твоея,/ да, сущи со мною, научит мя, что благоугодно есть пред Тобою,/ и наставит мя в разум, и сохранит мя в славе своей./ Помышления бо смертных вся боязлива, и погрешительна умышления их.
Премудрости Соломоновы чтение (глава 3):
Праведных души в руце Божией, и не прикоснется их мука./ Непщевани быша во очесех безумных умрети, и вменися озлобление исход их./ И еже от нас шествие сокрушение, они же суть в мире./ Ибо пред лицем человеческим аще и муку приимут, упование их безсмертия исполнено./ И вмале наказани бывше, великими благодетельствовани будут,/ яко Бог искуси я и обрете их достойны Себе./ Яко злато в горниле, искуси их и яко всеплодие жертвенное прият я./ И во время посещения их возсияют и, яко искры по стеблию, потекут./ Судят языком и обладают людьми, и воцарится Господь в них во веки./ Надеющиися Нань разумеют истину и вернии в любви пребудут Ему./ Яко благодать и милость в преподобных Его, и посещение во избранных Его.
На литии стихиры, глас 2:
Ныне земля Воронежская преславно ликовствует, / прославляя предивное свое прозябение, / преподобного и богоносного отца нашего Сергия. / Сей благоуханный крин вертограда Христова, / возратил Господь в краю Святителя Митрофана. / Коего даровал блаженному Сергию/ прилежным покровителем и в бедах пречудным заступником. / О Сергие пребогате, / буди отечеству твоему присный заступник, / граду Воронежу, в немже млеком богословия воспитан был еси, - утверждение, // и всем согласно воспевающим тя - благолепное украшение.
В земле Орловской благоизволи Архиерей Небесный / ти отче Сергие о стаде овец Христовых прилежати./ Ты же неустанно о спасении оных подвизался еси, / и егда оныя на брань с супостатом в дальние края быша послани, / ничтоже сумняшеся вслед чад твоих последовал еси. / На брани же, не жалея живота своего, / паству своею неустанно окормлял еси. / Оныя же видя сугубое Твое о Христе горение, // с великим дерзновением душу за Отечество полагали есте.
Дивная похвало первопрестольному граду Москве / пребогате Сергие ты явился еси, / егда промышлением Господним, / ты избран был еси духовным отцем / сестер честныя обители Марфы и Марии, / юже попечением преподобномученицы Елисаветы / Бог на твердом камени милосердия наздал еси. / Ты же преславне Сергие, / духовным горением возжег еси во обителе сугубую ревность по Бозе, / еюже движимии сестры обители / быша истовии служителие Богу и ближним. / На оных и твоя преподобне велиции подвиги взирающе // прославляем Отца нашего Небесного.
Тверская похвало богоблаженне Сергие, / рачением Христовым в лютую годину ты прехвальне в весь Владычно вселился еси, / и в подвизех, трудех и молитвах прилежно подвизался еси. / Сего ради виде Господь безну смирения твоего, возвышаемую превыше небес, / дарова тебе отче, чадом Своим во источник преславный чудес, / от него же прилежно почерплющии, / благодати Господней сподобляются, / и в вере зело укреляются, / мы же прибегающе к раце моще твоих / благодать неизреченную восприемлем // прославляя прославльшаго тя Господа.
Слава, глас 5:
Неможет укрытися град верху горы стоя, / - сие евангельское слово в чудном Сергие воплощаемо бысть. / Ибо всякий град и страна, / идеже провождаше свой жизненный путь претихий исповедник сей, / украшени быша предивными подвигами онаго. / Мы же взирающе на толикое сокровище Божественные благодати, / согласно взываем ему, поюще: / не остави нас сирых / бес твоего молитвеннаго предстательства, / но буди милосердный утешетель, / всех к тебе с молитвой прибегающих // богоносе Сергие.
И ныне, глас той же:
Блажим Тя, Богородице Дево, / и славим Тя, вернии, по долгу, / град непоколебимый, стену необоримую, / твердую предстательницу // и прибежище душ наших.
На стиховне стихиры, глас 1:
Преподобне и богоблаженне Сергие, / ты тесноту истиннаго пути Господня бодрено перенесл еси / и во страданиях за Христа, яко сребро в горниле очищен был еси. / И велиих даров Святаго Духа сподобился еси, / не остави нас предстательством твоим пред Господом, / но буди нам присный ходатай, // прося нам мира и велия милости.
Стих: Восхвалятся преподобнии во славе, / и возрадуются на ложах своих.
Преподобне и богоглаголиве Сергие, / ты неложно пастырем добрым / для всех чад твоих был еси, / со всяким тщанием о спасении оных подвизался еси. / Неустанно словом истины Господней овец Христовых окормлял еси, / и ко пристанищу небурному их провождал еси. / Буди и ныне нам благим помошником, / и сподоби нас молитвами твоими невечерняго Дня достигнути, // прося нам мира и велия милости.
Стих: Воспойте Господеви песнь нову, / хваление Его в Церкви преподобных.
Преподобне и богоносне Сергие, / ты со всяки тщание воззвание Господне восприял еси, / и на сердце твоем златыми писмены начертал еси: / аще кто исповесть Мя пред человеки, / того Сын Человечь исповесть пред ангелы. / Ты же пречудне отче, дерзновенно Христа исповедал еси, / ни во что же живот свой вменяющи. / Сего ради блаженное исповедание от Господа приял еси, / неостави нас чтущих подвиги твоя блаженне, // прося нам мира и велия милости.
Слава, глас 6:
Честное житие боголюбезного Сергия, / ныне согласно прославляюще, / терпению предивному от него научаемся, / незлобию его пречудному зело удивляемся, / трудолюбием прилежным оного обогащаемся. / И великое множество его добродетелей воспевающе, / прославляем его прославльшаго Господа, / пребогато дарующего нам молитвами святых // мир и велию милость.
И ныне, глас той же: Творец и Избавитель...
Тропарь, глас 8:
Доблий воинов Российских пастырю,/ благочестия и веры крепкий адаманте,/ преподобномученицы Елисаветы бодренный сподвижниче,/ мудрый наставниче сестер обители Милосердия,/ незлобиво узы претерпевый за Христа/ и велиих даров Святаго Духа сподобльшийся,/ исповедниче и равноангельне подвижниче Сергие,/ моли Христа, Емуже добре послужил еси// смирение спасительное нам даровати.
Ин тропарь, глас 1:
Блаженство чистоты сердечныя стяжав,/ богомудре отче Сергие,/ богозрачныя доброты наслаждаяся,/ орган божественнаго Утешетеля явился еси,/ страждущаго Христа в ближнем узрел еси,/ Того смирению причастник явился еси./ Слава, на камени исповедания Утвердившему тя./ Слава, Венчавшему труды твоя.// Слава, доброту пастырства тобою Явльшему.
Ин тропарь, глас 2:
Милосердия неустанного проповедника,/ и предивного о нас молитвенника,/ наставника богомудрого, и исповедника превеликаго,/ чудотворца претихаго, и ходатая пред Богом прилежнаго,/ преподобнаго и богоноснаго отца нашего Сергия,/ воспевающе велегласно, молим:/ испроси нам у великодаровитаго Господа// оставления грехов и велию милость.
НА УТРЕНИ.
На Б
ог Господь: тропарь святаго дважды.
Слава, и ныне, Богородичен.
По 1-м стихословии седален, глас 4:
Священного учителя воспоим прилежно, / яко сей усердно нучает ны / своим словом, житием и многими подвиги / превеликим добродетелем: / кротости, вздержанию, смирению, терпению и любви. / Мы же ныне прилежно внимающе / оному научению, воззовем сице: / пребогате отче Сергие, неустанный ходатай буди / всем верою и любовию чтущим пречестную память твою.
Слава, и ныне. Богородичен:
Пренепорочная Владычице Мати Господа, / неувядаемый Цвете райский, / златая Стамно - Манны, / горо святая от Нея же нерукосечно / чудный Камень отсечеся. / Тебе бо Чистая немолчно воспевают и блажат ангели и человецы: / буди непреложная Ходатаице всем верою и любовию, // поклоняющимся пресвятому Рождеству Твоему.
По 2-м стихословии седален, глас 5:
Любовию небесною украшен был еси, / богомудре преподобне Серигие, / красная мира сего ни во что же вменив, / научил еси коегождо прилежно поприще своя жизни безропотно провождати, / и неустанно имя Христово призывати, / и ближния в напасти неоставляти, / наипаче же о горнем злате помышляти / и в Бога добродетелию богатети. / Мы же ныне прилежно внимающе / оному научению, воззовем сице: / пребогате отче Сергие, неустанный ходатай буди / всем верою и любовию чтущим пречестную память твою.
Слава, и ныне. Богородичен:
Крепкое заступление к Тебе прибегающих, / Пресвятая Мати Дево Богородице, / неостави нас Своею молитвою, / наипаче со тщанием призри на ны обуреваемыя житейскими волнами / и пристанища разве Тебе тихаго неимущия, / и присно управи ны ко спасению, / во еже со Архангелом воспевати Ти: // Благодатная Дево радуйся.
Величание:
Величаем тя, / преподобне отче наш Сергие, / и чтим святую память твою, / милосердия неустанного проповедника, // и неуклонна Христова исповедника.
Псалoм избрaнный: Блажен муж бояйся Господа:
По полиелее седален, глас 6:
Сергию богомудрому подражающе, / возлюбим паче прочих дородетелей милосердие, / оного неустанный проповедник был еси, / вся верныя поучал еси, / наипаче в любви к ближнему подвизатися, / ибо сие бо есть златый путь к Небесному Отвечеству, / его же проходяще со тщанием / сподобимся восприяти грехов оставление // и душам наших спасение.
Слава:
Сестер обители Марфы и Марии добрый учителю, / премудрый наставниче преподобномученицы Елисаветы, / добрый пастырь воинства Русского, / монашествующих славное утверждение, / пастырей предивная похвало, / всем христианом правело добродетели, / неостави нас своим заступлением, // но присно о нас моли Триединаго Бога.
И ныне. Богородичен:
Пренепорочная Владычице / Мати Творца небеси и земли / от славного Гавриила приемшая / чудное приветствие: радуйся. / Прими и ныне от нас сия хвалебная пения / и купно с преподобным отцем нашим исповедником Сергием, / моли Сына Твоего Христа Бога нашего // да спасет Тобою Пречистая души наша.
Тaже степeнна, 1-й антифoн 4-го глaса.
Прокимен, глaс 4-й: Честнa прeд Гoсподем / смeрть преподoбных Егo. Стих: Чтo воздaм Гoсподеви о всeх, яже воздадe ми?
Всякое дыхaние: Евaнгелие от Матфея, зачaло 15.
По 50-м псалмe стихира, глaс 6:
Преподoбне oтче исповедниче Сергие, / во всю зeмлю изыде вещaние исправлeний твоих, / тeм на Небесeх обрeл еси мзду трудoв твоих, / дeмонския погубил еси полки / и Aнгельския достигл еси чины, / ихже житию без порoка поревновaл еси, / дерзновeние имeя ко Христу Бoгу, // мир испроси душaм нaшим и вeлию милость.
Канон Октоиха Богородицы на 6, глас 3, егоже краестрочие: Пою третие пение Тебе Богородице: и канон преподобного на 8.
Песнь 1.
Ирмос: Воды дрeвле, / мaнием божeственным, / во едино сонмище совокупивый, / и разделивый море израильтейским людем, / сeй Бог нaш, / препрослaвлен есть: / тому единому поим, яко прослaвися.
Се ныне Господи Боже наш,/ даруй нам грешным воспети по достоянию/ со блогоговением и усердием песнь угоднику Твоему Сергию,/ яко в житии своем непрпестанно Тебе Единому взывал еси,// яко прославися.
Еже исполни Свое предивное смотрение непостижимый Господь,/ благоизволи родитися избраннику Своему в земли Воронежстей,/ и сего ради благоговейнии родителие нарекоша красно чадо сие/ именем первого светильника земли сия Митрофана,/ яко той прилежно поучал еси вся пети:// Владыце Единому поим, яко прославися.
Ради стяжания духовного звания/ богобоязненный иерей Василий/ отда чадо свое на учение/ в школу духовную града Воронежа./ В ней же прилежно поучался еси пети Богу:// яко прославися.
Богородичен: Госпоже Пречистая/ всякий род немолчно воспевает Тя,/ яко безсеменно родила еси/ Егоже вся воинства небесная трепещут, воспевающе:/ сей Бог наш, препрославлен есть:// Тому единому поим, яко прославися.
Катавасия по Уставу.
Песнь 3.
Ирмос: И
же от не сущих вся приведый, / Словом созидаемая, / совершаемая Духом, / Вседержителю Вышний, / в любви Твоей утверди мене.
И
же древле прельсти в раи Еву/ тщался еси юнаго Митрофана/ отвадети от благаго священнического поприща/ и побуди его изшедша из духовныя школы,/ в далеком граде Варшаве вступити на мирскую стезю,/ но туне быша старания лукаваго,/ яко и зде сей избранник Христов, прилежно взывал еси:// Вседержителю Вышний, в любви Твоей утверди мене.
Юже, Христе, благоизволил еси рабу Твоему Митрофану в жены,/ обретеся ему в стране Польской./ И тако Господь, обращающий лукавая во благая,/ незримо промышлял о избраннике Своем,/ и той во умилении вопиял еси:// Вседержителю Вышний, в любви Твоей утверди мене.
Божественною ревностию распаламь,/ восхотел еси всего себе, богомудре Митрофане,/ отдати на служение ближнему,/ но добре разумев, яко всяко мирское служение суетно есть,/ возжелал еси восприяти дар священства./ Сего ради со своею супружницею возвратился еси в отчий дом,/ идеже паки воззвал еси:// Вседержителю Вышний, в любви Твоей утверди мене.
Богородичен: О, велие чудо!/ О, предивное явление! - рождество Твое Богорадованная,/ яко сим мы от адских уз избавихомся/ и во благоговении научихомся/ прилежно пети Сыну Твоему и Богу нашему:// Вседержителю Вышний, в любви Твоей утверди ны.
Ин кондак, глас 2:
Насладився Богомудре воздержания,/ и желания плосткая ты успил еси,/ явився верою возращаемь,/ и яко живота древо райское процвел еси,// Сергие отче священнейший.
Седален, глас 5:
Днесь сошедшеся восхвалим вернии/ преподобного отца нашего Сергия,/ яко житием своим прилежно научает нас:/ неленностно Христа в мире сем исповедавати,/ душу свою молитвою питати,/ путем милосердия неустанно шествавали,/ светильником Слова Божия мглу неведения разгоняти,/ и во умилении Господу взывати:// разве Тебе, Христе, инаго Бога не вены.
Слава, и ныне. Богородичен:
Пресвятая Дево Владычице,/ Тебе, вся наша нужды ведающей,/ и предстательсвом Своим верныя не оставляющей,/ молимся прилежно,/ буди нам пред престолом Сына Твоего милостивая ходатаице,/ прилоги вражия от нас отгоняющая,/ и ко спасению верно настовляющая,/ вся смиренно вопиющия:// разве Тебе, инаго Покрова не имамы.
Песнь 4.
Ирмос: Положил еси к нам твердую любовь Господи, / Единородного бо Твоего Сына за ны на смерть дал еси. / Темже Ти зовем благодаряще: / слава силе Твоей Господи.
Господь видя смиренное желание раба Своего Митрофана/ служение священническое подъяти,/ сподоби его восприяти сей превеликий дар/ у мощей угодника Своего святителя Митрофана./ Прием же оный абие, благодаряще Христа, воспел еси:// слава силе, Твоей Господи.
О спасении чад Своих промышляя, Премилостивый Господь,/ благоизволи благоговейному иерею Своему Митрофану/ проходити стезю служения своего в богоспосаемом граде Орле,/ и наставляти наипаче воинов христолюбиваго войска Российского./ Ихже прилежно окормляти / словом Христовой истины потщался еси,// поя Богу: слава силе, Твоей Господи.
Бог, видя с прилежанием производимое попечение/ об овцах Своего стада,/ сподоби богомудрого Мирофана/ быти свидетелем пречуднаго прославления/ великаго угодника Христова Серафима,/ идеже видя пребогатые знамения благодати Господней,/ воззвал прилежно:// слава силе, Твоей Господи.
Богородичен: Лицы ангел и святых собори/ не возмогоша по достоянию Тя восхвалити Мати Христова,/ мы же грешнии дерзающе пети Тебе, молим:/ да призриши милостивым Твои оком на ны немощныя,/ поющия Сыну Твоему:// слава силе, Твоей Господи.
Песнь 5.
Ирмос: К Тебе утренюю всех Творцу, / преимущему всяк ум мирови, / зане свет - повеления Твоя: / в нихже настави мя.
Аще кто душу свою положит за други своя/ той имать, - рече Господь, - вяшшую любовь,/ сего ради боголюбезный Митрофан,/ ни во что жизнь свою вменивше,/ последовал еси вслед паствы своея/ на поле брани в дальний край,// идеже прилежно послужил еси Господу, Отечеству и людем.
Живота своего нещадити ради веры Христовы и Отечества,/ ты отче Митрофане научаеши,/ и мы внемлуще словесем твоим,/ взываем к Единей Надежде нашей:// светом повелений Твоих, Господи, настави ны.
Еже промышляет о спасении коегождо,/ дарова разум прилежному служителю Своему Митрофану,/ во еже како подобает устроити чудную обитель Марфы и Марии,/ юже возжелала еси создати угодница Христова Елисавета Феодоровна./ Ей же стал еси сотрудником и помошником// сей избранник Христов Митрофан.
Богородичен: Некогда дерзость Аффониеву отмстившая Пресвятая Дево,/ абие по обращении оного исцеление тому подала еси./ Тако и ныне от сумнений своих раб Господень Митрофан / оным недугом подажен был еси,/ но быв тако вразумлен, от Тебе Пречистая/ свобождение от немощи радостно приял еси,/ взывая: радуйся, Благодатная, Господь с Тобою.
Песнь 6.
Ирмос: Бездна последняя грехов обыде мя, / и исчезает дух мой; / но прострый Владыко высокую Твою мышцу, / яко Петра мя Управителю спаси.
Ни како же отлучаяся, пребывал еси Господь неотступно/ подле неустаннаго делателя вертограда Своего богомудраго Митрофана./ Сей же, со всяким усердием, день и ночь подвизался еси/ о спасении сестер дивныя обители милосердия,/ в ней же постави Господь сего служителя Своего стражем духовным,/ во еже поучати всех непрестанно пети:// яко Петра мя Управителю спаси.
О велие чудо, даровася Отечеству нашему,/ аки сад Едемский расцвела еси пречудно святая обитель Марфы и Марии,/ благовонием милосердия источая во вся пределы Российския/ благоухание Христовой благодати,/ сего ради мнози видящии сие знамение,/ паки ко Господу прибегаху, взывая:// яко Петра мя Управителю спаси.
Мощно ли скрытися граду верху горы стоящу?/ - Несть, - рече Господь,/ тако воистину был еси ты отче наш Митрофане аки град благодатен,/ венчающ гору милосердия святыя обители Марфы и Марии./ В ней же ты кормчим от Христа поставлен был еси,/ во еже неленностно воспевати:// яко Петра мя Управителю спаси.
Богородичен: Утешение нам рождшая - Избавителя и Спаса всех Христа,/ Дево Пречистая Богородице,/ неустанно хвалим Тя, Непорочная,// и превозносим преславное Твое Рождество.
Кондак, глас 3:
Божественнаго Духа храм предивен явился еси, / евангельских добродетелей певец неустанен. / Богу, Церкви и Отечеству прилежно послужил еси, / и нас любви к Богу и ближним словом и житием своим научил еси. / Исповедал еси небоязненно пред гонители Слово явльшееся в плоти, / суровы лишения и узы претерпел еси. / Сего ради от Христа Бога великия дарования прием, / знамения благодати обильно являеши. / Сергие пречудне отче моли / и нам грешным чадом Твоим // на небеси некрадомое сокровище восприяти.
Икос:
От юности Крест Господень взем на рамо свое, / последовал еси узким путем в след Божественного Учителя, / во всем был еси верен Ему, / со смирением приемля от Него вся промышления: / во учении прилежно подвизался еси, / блаженнаго супружества сподобился еси, / во священстве данный ти залог верно соблюл еси, / воинства нашего добрый пастырь был еси, / воистину неусыпный страж обители Марфы и Марии явился еси, / лику монашествующих радостно приобщился еси, / от безбожных горькия узы кротко претерпел еси, / даром чудотворения славно обогатился еси, / блаженную кончину мирно приял еси, / но не оставил еси своим попечением верныя чада своя. / Мы же ныне воспевающе предивныя подвиги Твоя, / прилежно взываем Ти: / Сергие пречудне отче моли / и нам грешным чадом Твоим // на небеси некрадомое сокровище восприяти.
Песнь 7.
Ирмос: Якоже древле благочестивыя три отроки оросил еси / в пламени халдейстем, / светлым Божества огнем и нас озари, / благословен еси, взывающия, Боже отец наших.
Время сугубых испытаний встретил еси/ отче наш Митрофане во всеоружии добродетелей/ и премного паче сил оберегал еси/ вверенный ти залог Христов от расхищения,/ егоже хищницы тщахуся попрати,/ но ты непреклонно бдел еси,/ поя непрестанно:// благословен еси, Боже отец наших.
О, неизреченна Премудрость Божественнаго промысла,/ исполни тя Господь, отче многочадия духовна / и призва с супружницею твоею к житию постническому / егоже восприемля наречен был еси именем великаго Сергия,/ коему последуя, непрестанно пел еси: // благословен еси, Боже отец наших.
Сергие богомудре отче наш,/ ты безропотно притерпел еси узы за Христа, благословляя гонители своя,/ поучал еси ближния боятися паче / могущего дущу и тело погубити в геене огненней,/ и призывал еси всякаго немолчно пети:// благословен еси, Боже отец наших.
Богородичен: Пречистая Приснодево,/ Ты еси неувядаемый Цвет целомудрия,/ возростившая Превеликий Плод чистоты,/ Ты еси стамна златая,/ носившая Манну Зиждительную,/ Ты еси храм Соломонов,/ содержавшая в Себе Пречудное Облако благодати,/ буди прилежная предстательнице пред Сыном Твоим/ всем поющим Ему:// благословен еси, Боже отец наших.
Песнь 8.
Ирмос: Нестерпимому огню соединившеся, / богочестия предстояше юноши, / пламенем же невреждени, Божественную песнь пояху: / благословите вся дела Господня Господа, / и превозносите во вся веки.
О, премного паче сил отяготишася/ сестры обители блаженных Марфы и Марии,/ егда безбожныя разоряху обитель сию,/ но ты еси отче/ кротчайшим гласом настовлял еси я/ бодренно пети в сей напасти Христу Богу:// благословите вся дела Господня Господа, и превозносите во вся веки.
Иже заблудшыя овцы взыскуя,/ Ты еси Христе Боже наш,/ направил еси блаженнаго отца нашего Сергия в пределы Тверския,/ дабы в лютую годину, егда вера истинная бысть в поношении,/ был еси в земли сей пастырь добрый,/ стрегущий от расхищения, Христе, овец Твоего стада,/ и неустанно их поучающий, Ти вопити:// благословите вся дела Господня Господа, и превозносите во вся веки.
Многоочитии херувими и шестокрилатии серафими/ немолчными гласы прославляют Христа Бога нашего,/ мы же последующе им/ купно с преподобным и богоносным отцем нашим Сергием,/ славяще Единаго в Троице Бога, взываем во умилении:// благословите вся дела Господня Господа, и превозносите во вся веки.
Богородичен: Христово освященное божественное Вместилище радуйся,/ яко Тобою неложна живота сподобихомся/ и от тли избавихомся,/ ныне же нас не забуди Тя величающих, Пресвятая Дево,/ и согласно Господа поющих:// благословите вся дела Господня Господа, и превозносите во вся веки.
Песнь 9.
Ирмос: Новое чудо и боголепное: / девическую бо дверь затворенную яве проходит Господь, / наг во входе, / и Плотоносец явися во исходе Бог, / и пребывает дверь затворена: / Сию неизреченно, яко Богоматерь величаем.
Волею Божией даровася нам превеликий ходатай и молитвенник,/ богоблаженне отче наш Сергие,/ мы же чада его прилежно вопием ему:/ незабуди молитвами твоими, отче:/ земли в нейже родился еси,/ духовныя школы в нейже нектар богословия почерпал еси,/ христолюбивое воинство, его же словом истины окормлял еси,/ и вся ны, к тебе в молитве прилежно прибегающия// и Пречистую Деву, яко Богоматерь величающия.
Ангелоподобным житием подвизался еси,/ ты отче наш Сергие,/ и ныне монашествующих укрепи молитвами Твоими к Подвигоположнику Христу,/ дабы сии от тебе прилежно поучались/ смиренно свое поприще прохождати// и Преблагословенную, яко Богоматерь величати.
Любовь, яже превыше всякия добродетели, имел еси отче/ и ныне прилежно молим тя святе:/ да испросиши у Христа Бога и нам грешным/ оного предивнаго сокровища стяжати// и Пренепорочную, яко Богоматерь величати.
Богородичен: Утроба Девы бысть пространнейшая небес,/ яже Невместимаго вместила еси,/ сего ради всякий род хвалит Ея,/ с Гавриилом: радуйся приносящи,// и сию неизреченно, яко Богоматерь величающи.
Светилен:
Света Подателю и веков Творче Господи, / просвещаяй и освящаяй всякаго человека грядущаго в мир, / знаминася свет Лица Твоего на богоблаженном исповеднике Сергие, / и сей бысть, по глаголу Твоему, воистину свет миру и соль земли, / егоже ублажающе, / прославляем Тя Свете истинный.
Слава, и ныне. Богородичен:
Пресветлая Заре Божественнаго Света, / Пресвятая Богородице Марие, / ныне приими нашу хвалебную песнь, / к Тебе во умилении вопиющих, / и умоли Сына Твоего Христа Бога нашего: / Светом Божественныя благодати Своея // расточити тьму прегрешений наших.
На хвалитех стихиры святaго на 4, глaс 3:
Торжество совершающе богоблаженнаго Сергия исповедника, / прославляем неизреченное милосердие Божие, / ибо небесе и земли Владыка, / дарова нам таковаго предивнаго предстателя, / добродетели изряднаго учителя, / благолепия церковнаго блюстителя, / прилежна о нас молитвенника // научающего нас воспевати Христа во веки.
Претихаго Сергия торжество совершающе, / поминаем онаго чудныя подвизи: / прилежное о пастве попечение, / молитвы, бдения и пощения, / дерзновенное Христа исповедание. / Сих же ради обильно благодать Христова на нем почила еси, / и даровала еси его прилежна о верных молитвенника, // научающего воспевати Христа во веки.
Ныне собравшеся вкупе, православных людей множества, / радостно недоумеюще: / како Божия мудросте и сило, / пречудно упраляет нас ко спасению, / даруя нам превеликое сокровище / честныя телеса Своих угодников, / истощающия обильныя струи благодати, / от нихже вся верно черплющие / непременно дивной помощи сподобляются. / Такожде славныя и честныя мощи богоноснаго исповедника Сергия, // быша нам сокровеще преславное.
Слава, глас 2:
Единаго от чуднаго сонма новомученник и исповедник Российских, / милосердия великаго проповедника, / преподобномученицы Елисаветы славнаго сподвижника, / земли Руссикия преславное украшение, / воинству нашему предивное утверждение, / пастырем, монахам и мирским от бед ограждение, // богомудрого отца нашего Сергия воспеваем торжество.
И ныне, глас той же:
Непроходимая врата / тайно запечатствованная, / благословенная Богородице Дево, / приими моления наша, / и принеси твоему Сыну и Богу, // да спасет Тобою души наша.

Славослoвие великое.
НА ЛИТУРГИИ
Блажeнны от канoна святaго, пeснь 3-я и 6-я.
Прокимен, глaс 7: Восхвалятся преподобнии во славе, / и возрадуются на ложах своих. Стих: Воспойте Господеви песнь нову, / хваление Его в Церкви преподобных. Апoстол к Ефесеем, зачaло 233. Аллилуия, глaс 6: Блажeн муж, бояйся Гoспода, в зaповедех Егo восхoщет зелo. Стих: Сильно на земли будет сeмя егo. Евaнгелие от Луки, зачaло 64. Причaстен: В пaмять вeчную будет прaведник:
МОЛИТВА
преподобному Сергию исповеднику,
архимандриту.
О избранниче и угодниче Христов, преподобноисповедниче Сергие, Церкве Русския столпе непоколебимый, земли нашея благое прозябение и красный плод, сродников твоих предстателю и наставниче! Ты во время гонения безбожнаго от сокровищницы души твоея спасительное исповедание Православныя веры изнесл еси, и людем верным пастырь добрый явился еси, душу твою за Христа и Его овцы полагая и лютыя волки далече отгоняя. Ныне убо призри на нас, недостойных чад твоих, умиленною душею и сокрушенным сердцем тя призывающих. Умоли Господа Бога, да простит согрешения наша и избавит от адовых уз и вечнаго мучения. Утверди нас в вере святой, научи нас всегда творити волю Божию и хранити заповеди церковныя. Буди пастырем нашим - правило веры, воином - вождь духовный, болящим - врач изрядный, печальным - утешитель, гонимым - заступник, юным - наставник, всем же благосердый отец и теплый молитвенник, яко да молитвами твоими соблюдется в Православии Святая Русь и непрестанно славится в ней имя Пресвятыя Троицы, Отца и Сына и Святаго Духа во веки веков. Аминь.


Служба составлена в Воронежской Православной Духовной семинарии в 2008 году. В дни памяти святого в Успенском семинарском храме города Воронеж богослужение совершается именно по этой службе.