?

Log in

No account? Create an account

sobor_voronezh


О Соборе Воронежских святых


Previous Entry Share Next Entry
Служба всем святым, в земле Воронежской просеявшим (вторая часть)
sobor_voronezh

Великая вечерня

На Утрени
На Б
ог Господь: тропарь святых дважды, глас 6.
Слава и ныне, воскресный Богородичен, глас тойже:
По 1-м стихословии седален святых, глас 2.
Подобен: А
постоле, Христу Богу:
Солнце правды, Христос, вас посла, якоже лучи, просвещающий землю Воронежскую, угодницы Божии, от рода нашего просиявшии. Темже молите Его, святии, облежащий нас ныне облак неверия разгнати и даровати нам мир и велию милость.
Слава, и ныне, Богородичен:
Молитвеннице теплая, Заступнице рода христианскаго, приими моления раб Твоих и осени Русь Православную покровом Твоея благости.
По 2-м стихословии седален, глас 1.
Подобен: Г
роб Твой:
Яко солнце светлое, яко блистающая денница, память честная в земли Русстей просиявших святых возсия, всех нас освещающи и согревающи сердца наша к подражанию житию их Божественному и к ревности о вере.
Слава, и ныне, Богородичен:
Настави нас на путь покаяния, уклоньшыяся присно к безпутиeм зол, и Преблгаго прогневавшыя Господа, Неискусобрачная Блгословенная Марие, прибежище отчаянных человековъ, Божие Жилище.
Величание святым: Величаем вас,/ святителие Христови Митрофане, Тихоне и Антоние,/ с нимиже вси святии в земли воронежстей просиявшия,/ вы бо молите о нас// Христа Бога нашего.
Псалом избранный
Благо есть исповедатися Господеви и пети Имени Твоему, Вышний,/ возвещати заутра милость Твою и истину Твою на всяку нощь./ Велий Господь и хвален зело, во граде Бога нашего, в горе святей Его./ Род и род восхвалят дела Твоя и силу Твою возвестят./ Великолепие славы святыни Твоея возглаголют и чудеса Твоя поведят./ Память множества благости Твоея отрыгнут и правдою Твоею возрадуются./ Господь крепость людем Своим даст, Господь благословит люди Своя миром./ Яко благоволит Господь в людех Своих и вознесет кроткия во спасение./ Возвеселятся вси уповающий на Тя, во век возрадуются,/ и вселишися в них, и похвалятся о Тебе любящий Имя Твое.
Седальны святых по полиелеи, глас 5:
Красуйся, светися, Русь Православная, лучами Креста, егоже имаши всем верным хранителя, ты же множество все демонское, тьмы исполньшееся, отвергни.
Слава, глас 3.
Подобен: Д
а веселятся:
Светло совершающе настоящее торжество, восхвалим и Андрея Первозваннаго, яко Русския земли апостола, перваго евангельским благовестием сию огласившаго, той бо, якоже древле праотцем нашим, тако и нам ныне взывает: идите, обретохом Желаемаго.
И ныне, Богородичен, глас 4:
Яко необоримую стену и источник чудес стяжавше Тя, раби Твои, Богородице Пречистая, сопротивных ополчения низлагаем. Темже молим Тя: мир земли Русстей даруй и душам нашим велию милость.
Прокимен, глас 4: Святым иже суть на земли Его,/ удиви Господь вся хотения Своя в них.
Стих: Сохрани мя Господи, яко на Тя уповах.
Евангелие от Матфея, зач. 10
Псалом 50.
Слава: Молитвами всех воронежских святых, Милостиве, очисти множество согрешений наших.
И ныне: Молитвами Богородицы, Милостиве, очисти множество согрешений наших.
Стихира святых по 50-м псалме, глас 6:
Ежелетнюю память днесь святых сродников наших совершающе,/ достойно сия да ублажим./ Тии воистинну чрез вся блаженства Господня проидоша:/ обнищавше бо духом обогатишася,/ и кротцы бывше землю кротких наследоваша,/ плакавше утешишася,/ алкавше правды насытишася,/ миловавше помиловани быша,/ чисти бывше сердцем Бога якоже мощно узреша,/ миротворивше Божественнаго сподобишася сыноположения,/ гоними же и мучими правды ради и благочестия бывшее/ на Небесех ныне веселятся и радуются прилежно,// и молятся Господеви помиловатися отечеству нашему.
Канон Великий молебный Богородице, глас 8: Скорбных наведения... (см. Приложения Октоиха), со ирмосом на 6, ирмос по дважды: и святых, на 8. Катавасия по уставу.
Канон всем святым в земли Воронежстей просиявшим, глас 8.
Песнь 1
Ирмос: Воду прошед...
Святителю отче наш Митрофане, моли Бога о нас:
С
вятителю отче Митрофане,/ первый Воронежу пастырю,/ мужество велие явивый,/ прещения царева и смерти не убоявыйся/ в простоте душу свою спасый,/ моли Христа Бога спастися душам нашим.
Святителю отче наш Митрофане, моли Бога о нас:
П
окровителя жизни нашея и молитвенника к Богу/ почитаем тя, приснославный отче наш Митрофане:/ на стезю нас покаяния направи,/ архиереев красото и верных утверждение.
Святителю отче наш Тихоне, моли Бога о нас:
Ч
ист быв сердцем, чистому Христу прилепился еси,/ святый Святому, любитель Любительному, кроткий Кроткому, / взывая непрестанно:/ мне прилеплятися Богови благо есть.
Святителю отче наш Тихоне, моли Бога о нас:
Я
ко пчела, мед сладкий от цветов скороувядающих собрал еси, отче наш Тихоне,/ от тленнаго мира духовное сокровище,/ имже всех нас услаждаеши.
Святителю отче наш Антоние, моли Бога о нас:
И
збран быв Господем/ служити честному Евангелию, блаженне Антоние, / во благоразумии люди, учении премудрыми отче, возрастил еси.
Святителю отче наш Антоние, моли Бога о нас:
У
мертвив первее плотская мудрования воздержанием и труды,/ святитель божествен показался еси,/ и предстатель наш пред Творцом всечестен явился еси.
Вси святии земли Воронежския, молите Бога о нас:
Т
воих святых воспевая чины,/ Твоим светом души наша, молитвами сих, озарити молимся:/ Ты бо еси свет неприступный,/ Твоими светлостьми, неведения мрак отгоняеши,/ Слове Божий светодавче Христе.
Вси святии земли Воронежския, молите Бога о нас:
С
вященным саном пастырие облекшеся,/ паству свою смиренно приведоша ко Христу,/ даром учительства украшении,/ ныне от Бога венцы правды прияли есте.
Богородичен: Недугующих телом и душею,/ посещения Божественнаго и промышления от Тебе сподоби, едина Богомaти,/ яко благая, Благaго же Родительница.
Песнь 3
Ирмос: Небеснаго круга...
Святителю отче наш Феофaне, моли Бога о нас:
И
мя твоe, святителю Феофaне, / яко миро, зeмлю нaшу облагоухa,/ услаждaюще сердцa вeрных, призывaюще всeх к духoвней рaдости и спасeнию.
Святителю отче наш Феофaне, моли Бога о нас:
С
вятче Бoжий, угoдниче Христoв Феофaне, / призри на нeмощи нaша и исцели души нaша, / страстьми присно обуревaемыя.
Святителю отче наш Владимире, моли Бога о нас:
И
скапая божественную сладость из устен твоих отче Владимире, и горькаго безбожия изсушил еси капли, напоив благочестивых питием Божияго разума блаженне.
Святителю отче наш Владимире, моли Бога о нас:
Б
ожиим судом произбран быв, святитель показался еси, безкровны жертвы Богу принося, пожершемуся нас ради, отче святителю, Владимире.
Святителю отче наш Иннокентие, моли Бога о нас:
Г
роб, идеже лежит честное тело твое, благовоние источает яко рай Божий, облагоухая верныя, святителю преславне и всечестне, Иннокентие.
Святителю отче наш Луко, моли Бога о нас:
Т
руды твоими, яко добрый пастырь, святителю Луко, указал еси людем путь в Царство Небесное и за подвиги твоя от Бога венчан славою на небеси, Егоже моли, да ниспослет и нам росу благодати Своея, Человеколюбец.
Вси святии земли Воронежския, молите Бога о наш.
Р
адующееся мученицы, крест Твой вземше,/ и честной страсть Твоей неуклонно подражающе,/ мучительскаго не убояшася прещения доблии,/ ни огня, ни меча, ни ран, ни глада, ниже смерти.
Вси святии земли Воронежския, молите Бога о нас:
У
красившеся добротами перваго добротворения,/ и явившеся яко непрелестная светила,/ прославиша Церковь Христову, святии,/ сего ради земля наша инаго украшения не весть/ токмо вы богомудрии.
Богородичен: Лютыми недуги и многоболезненными страстьми истязaемым,/ Дево, Ты нам помози:/ исцелений бо неоскудное Тя знаем сокровище,/ Пренепорочная, неиждивaемое.
Седален, глас 7:
Нощней тьме огустевающей, умножается звездный блеск, и к тому очи заблуждших радостно возводятся. Тако и умножевшейся на земли греховней тьме, возведем горе очи наши, братие, и, сияние духовных звезд, землю нашу озаряющих, узревше, к Небесному отечеству потщимся, егоже да не лишит Господь нас, грешных, молитвами святых своих.
Слава, и ныне, Богородичен:
Мучеников, пророков, апостолов, иерархов, преподобных и святых всех от века праведных, похвала ты еси Пречистая, темже Тя молим: молися с ними ко Господу, да спасет души наша.
Песнь 4
Ирмос: Услышах, Господи...
Священномучениче Тихоне, моли Бога о нас.
Б
езбоязненно проповедовал еси людем покаяние, священномучениче Тихоне,/ да обратят сердца своя к Богу/ и токмо на Него в скорбех и лишениих упование имут.
Священномучениче Тихоне, моли Бога о нас.
В
оли Божией послушлив быв,/ святительства жезл приял еси, священномучениче Тихоне,/ и, за Христа даже до смерти пострадав,/ верный сын Церкве явился еси.
Священномучениче Петре, моли Бога о нас:
В
сем житием твоим верность Христу показал еси,/ всякаго блага земнаго отвергся,/ в премудрости Божий выну поучался еси, Петре:/ Ангельскаго образа красотою украсився,/ священства небесною мастию помазався,/ добре земное служение свое совершал еси./ С вышними чины ныне пред лицем Господним предстоиши,/ пением хвалебным Церковию прославляемь.
Священномучениче Петре, моли Бога о нас:
В
о дни богоборений лютых/ яви Господь земли Российстей верных служителей своих,/ страха вражия не устрашившихся, якоже архиепископ Петр,/ святитель Христов доблественен,/ Небесному Архиерею преподобен.
Священномучениче Захарие, моли Бога о нас.
В
ся земная ни во что вменив Христа ради,/ словом и житием, священномучениче Захарие, верных поучал еси:/ о Бозе сотворим силу,/ и Той уничижит стужающия нам.
Священномучениче Захарие, моли Бога о нас.
И
мже образом желает елень на источники водныя, / сице ты, страстотерпче Захарие, к живоносным страданием за Христа притекл еси, / имиже присно священно обновляется лице земли Русския.
Вси святии земли Воронежския, молите Бога о нас:
С
овокупльшеся собор святых Твоих любовию,/ и Тебою наслаждается, истинно же и чисто в радости,/ ликом Ангелов сликуя,/ о Тебе Всевидче, Бозе всех и Господе.
Вси святии земли Воронежския, молите Бога о нас:
Ю
ношески славнии священномученицы,/ венцем мученическим украсистеся,/ богодарованным помазанием обогатистеся,/ еже первее священством украшени, пребогатии./ Темже венцы правды достойно приемше,/ со Христом вечно радуетеся.
Богородичен: Надежду и утверждение и спасения стену недвижиму имуще Тя, Всепетая, неудобства всякаго избавляемся.
Песнь 5
Ирмос: Просвети нас...
Священномучениче Петре, моли Бога о нас.
З
емлю Русскую, безбожными гонении нещадно жегомую,/ слезами и кровьми твоими напоил еси, священномучениче Петре,/ сего ради плоды веры, чада церковная, возрастил еси.
Священномучениче Уаре, моли Бога о нас.
Р
азгоревшуюся огню богоборчества сатанинскаго, посреде стал еси неопалим, преславне святителю Уаре, Божественная бо роса Святаго окружи тя Духа, яко священнотаинника и служителя Божественныя славы и вышния Светлости причастника.
Священномучениче Сергие, моли Бога о нас
Б
лагословляя гонителей твоих, блаженне Сергие,/ усердно молился еси за них,/ да покаются и купно с верными братиями благословят Господа.
Священномучениче Онуфрие, моли Бога о нас.
Т
есный путь со скорбьми и печальми прошел еси, боголюбиве Онуфрие, от младенчества до последнего твоего издыхания: гонения, поношения и темничные заточения, не имея где главы приклонити, до пота крови работая Христу прилежно.
Священномучениче Игнатие, моли Бога о нас.
З
лобы мучителей не убоялся еси,/ огнем любве Божественныя тыя препобедив,/ темже благодать молитися о нас стяжал еси, священномучениче Игнатие, достохвальне.
Священномучениче Василие, моли Бога о нас.
Е
гда безбожнии тщахуся сокрыти тя в темнице, священномучениче Василие,/ Господь яви тя исповедника Своего всем концем земли Русския.
Священномучениче Митрофане, моли Бога о нас.
Р
усския Церкве святильниче священный Митрофане, / кровьми мученическими неугасимо светяй / и у Престола Божия предстояй, / молися о чтущих тя.
Вси святии земли Воронежския, молите Бога о нас:
П
лотское мудрование, все духу, богоноснии, воистину повинусте,/ постнически сего стремления неудержимая, постом смиристе:/ и ныне безстрастия светом просветившеся,/ мзду трудов приясте.
Богородичен: Исцели, Чистая, душ наших неможение/, посещения Твоего сподобляющи,/ и здрaвие молитвами Твоими подaждь нам.
Песнь 6
Ирмос: Молитву пролию...
Вси святии земли Воронежския, молите Бога о нас:
Л
ик святых ныне сияет божественными дарованьми:/ святителей и мученик собори,/ и постников же, и учителей,/ и праведных, со священномученики.
Вси святии земли Воронежския, молите Бога о нас:
С
ияющее зряще, Твоих святых днесь собрание,/ Твоею Спасе светлостию, и свещами неугасаемыми благодатей украшенное,/ Твое божественное богатство благих и изобилие,/ воспеваем непрестанно Человеколюбче.
Вси святии земли Воронежския, молите Бога о нас:
Я
ко Христос Первомученик, мученицы честнии,/ муки зело претерпесте, терпеливо же и доблественне,/ аки в чуждих страдальчествующе телесех славнии,/ ныне же царствия небеснаго наследницы явистеся,/ верным исцеления источаете.
Вси святии земли Воронежския, молите Бога о нас
Ходатаи суще за отечество ваше земное,/ научите убо и нас Православие дерзновенно исповедати/ и страха вражия не боятися.
Богородичен: На одре ныне немощствуяй лежу,/ и несть исцеления плоти моей:/ но, Бога и Спaса миру и Избaвителя недугов рождшая,/ Тебе молюся, Благой/: от тли недуг возстaви мя.
Кондак, глас 4:
Во свете богомудрых иерархов,/ столпов веры Митрофана, Тихона и Антония,/ днесь красуется преславный град Воронеж,/ яко освященный собор святых предстоит Владыце Вседержителю:/ темже Силы Небесныя ликовствуют и Святую Троицу воспевают;/ с нимиже вси благодарственно вопием Богу/ о еже даровати нам оставление грехов// и велию милость.
Икос:
Ныне земля Воронежская преславно ликовствует,/ яко предивное сокровище нам явишася:/ собор преславных угодник Христовых,/ в немже, яко светила пресветлая,/ великими чудесы просияша:/ Митрофан богомудрый, с Тиханом богоглаголевым, и Антонием боголюбезным./ О велиции наши сродницы,/ молитися Христу Богу/ да сохранит отечество наше невредимо:/ от всякаго злаго обстояния,/ и от всех навет вражиих,/ да и мы со всеми вами/ благодарственно вопием Богу/ о еже даровати нам оставление грехов и велию милость.
Песнь 7
Ирмос: От Иудеи...
Преподобномучениче Георгие, моли Бога о нас.
М
илования еже к плоти отлучив ум твой блаженне Георгие, опаляемь огнем и сожигаемь мудре, отроческую воспевая песнь: благословен Бог отец наших.
Преподобномучениче Иннокентие, моли Бога о нас.
О
тгоними бывают единым призыванием твоим, лукавии дуси, познавшии тя постника и мученка Христова, преподобне Иннокентие, поюща тепле: благословен бог отец наших.
Преподобномучениче Амвросие, моли Бога о нас.
В
озвещен ти бысть конец преблаженне, Амвросие, вседетельною волею: тем вдался еси большему пощению, и от славы в славу преходиши, убиен был еси Христа ради над всеми Бога.
Священномучениче Алексие, моли Бога о нас.
Я
ко трие отроцы, в пещи вавилонстей пламенем объятии, молитвою не сгараху,/ тако ты, священномучениче Алексие, во огни мучений благодатию веру сохранил еси./ Сего ради ныне с новомученики Российскими ликуеши:/ отцев Боже благословен еси.
Священномучениче Василие, моли Бога о нас.
Я
коже древле отроцы, в пещи неопаляемии, златому истукану не поклонишася,/ тако же и ты, священномучениче Василие, огнем мучений неопаляемь,/ безбожие небоязненно обличал еси, взывая с новомученики Российскими:/ отцев Боже благословен еси.
Священномучениче Александре, моли Бога о нас.
Ж
ертву живую и всесожжение Творцу себе самаго принося, священномучениче Александре,/ с новомученики Российскими воспевал еси:/ могущии, покаряйтеся, яко с нами Бог отцев земли нашея.
Священномучениче Митрофане, моли Бога о нас.
Р
уками беззаконных убиен,/ жертва благоприятная и вольное заколение Богу принеслся еси, святче Божий Митрофане./ Тем благодарне память твою почитаем.
Священномучениче Ионнне, моли Бога о нас.
Г
осподь, исполняя смотрение Свое о Церкви Русстей,/ заступника тя, священномучениче Иоанне, содела./ Темже молися Ему, во благочестии нам пребывати и спастися душам нашим.
Вси святии земли Воронежский, молите Бога о нас
С
вятых чинове, сладости божественныя ныне наслаждающеся,/во святых Почивающаго немолчно поюще:/ благословен Бог отец наших.
Вcи святии земли Воронежския, молите Бога о нас:
Р
адующеся, воспоим святых всех собор,/ дерзновенно Христа исповедавших даже до смерти,/ и о нас непрестанно молящихся,/ непорочно взывающе:/ благословен Бог отец наших.
Богородичен: Телесныя слабости и душевныя недуги, Богородительнице,/ любовию приступaющих к крову Твоему,/ Дево, исцелити сподоби,/ Спaса Христа нам рождшая.
Песнь 8
Ирмос: Царя Небеснаго...
Преподобне отче Силуане, моли Бога о нас.
Я
ко крин предивный и сапфир пречудный, / в вертогрaде Пречистыя процвeл еси, преподoбне Силуaне, / Владыце твоему Христу смирeнно ревнуя, выше бо человeка восприeм житиe, / имже мнoгих души Гoсподу приводиши.
Преподобне отче Силуане, моли Бога о нас.
В
оистинну носитель дарoв Святaго Дuха был еси / и различными добродeтельми украшeн, Силуaне, / смирeнием гoрнюю высоту наслeдив, нищетoю Небeсное богaтство изрядно приял еси. / Наслeдники сегo покажи ны, молитвами твоими.
Преподобне отче Иларионе, моли Бога о нас.
Н
евозвратно шествовав отче премудре Иларионе и досточудне, ведущими к небеси божественными стезями, от зле ведущих до конца уклонился еси.
Преподобне отче Иларионе, моли Бога о нас.
В
сельшеюся благодатию в душу твою отче Иларионе лукавно живущии в человецех нечистии дуси отгоними бывают.
Преподобне отче Амвросие, моли Бога о нас.
Прият Елисей от Илии благодать сугубую, на тебе же, отче Амвросие, благодать почи отец Льва и Макария. Сего ради ты богоблаженне отче любовь в себе стяжал еси, совершение добродетелей: всем бо вся был еси, и убогим прибежище.
Преподобне отче Иларионе, моли Бога о нас.
Отче Иларионе, уклонився от мира, и вся яже в нем оставль и уметы вменив, старцем прилепися, Леониду с Макарием, власть от Христа прият бесы прогоняти.
Преподобне отче Нектарие, моли Бога о нас.
С
лаве вечней причастник бысть Нектарий, уклонився житейския славы: всяк бо смиряяй себе вознесется.
Преподобне отче исповедниче Сергие, моли Бога о нас.
С
ергие богомудре отче наш,/ ты безропотно притерпел еси узы за Христа, благословляя гонители своя,/ поучал еси ближния боятися паче/ могущего и дущу и тело погубити в геене огненней,/ и призывал еси всякого немолчно пети:// благословен еси, Боже отец наших.
Вси святии земли Воронежския, молите Бога о нас:
Я
же паче ума светлостию, насыщаеми святии/ божественнаго веселия, и радости исполняющеся,/ бози бываете, к Богу приближением,/ богодетельным светом обогащающеся/ и просвещаетеся лучами неизреченныя, славы,/ Христа превозносяще во веки.
Вси святии земли Воронежския, молите Бога о нас
Я
вишася, святии яко звезды многосветлыя,/ церковное небо уясняюще многоразличными даровании и многообразными добротами,/ в правде, целомудрии, мужестве, и разуме, взывая:/ Владыку священницы воспойте, людие превозносите во вся веки.
Троичен: О Троице Честная, прими,/ яже приносит Ти земля Ворнежская,/ яко начатки и яко фимиам избранный,/ вся угодившия Ти и прежде, и послежде, знаемыя и незнаемыя,/ и молитвами их от всякаго вреда страну Русскую сохрани.
Богородичен: Напaстей Ты прилоги отгоняеши/ и страстей находы, Дево:/ темже Тя поем во вся веки.
Песнь 9
Ирмос: Воистину Богородицу...
Святый блаженный отче наш Иоанне, моли Бога о нас
В
сем сердцем отче наш Иоанне, троице усердно предложився, и от нея лучи благодетельно прием, световиден был еси, и со ангелы ликуеши.
Святый мучениче Льве, моли Бога о нас.
П
риидите сошедшеся вернии, преблаженнаго и священнаго мученка Христова, Льва, священное торжество совершим днесь: страдальчески бо вся вражия множества божественною силою победил есть.
Преподобная мати Дарие, моли Бога о нас.
В
озжелела еси доброту мысленную Жениха, и чисто возлюбила еси Его, где почиваеши; где ли пасеши; тепле вопияла еси блаженная мати Дарие: да почию у тебе, и в твоих светлостех наслаждуся, величающи твою благость.
Преподобная мати Серафимо, моли Бога о нас.
Р
азум имела еси в твоей души, и смирение, и божественную кротость, веру несумненну, и надежду и любовь, юже к Богу: всенощными молитвами приближающися ему, и тамо сущими светлостьми блаженная, Серафимо, озаряема и просвещаема.
Святый праведный воине Феодоре, моли Бога о нас.
О,
воине Феодоре! Ты днесь Престолу Божию предстоиши и Славу Его откровенным лицем созерцаеши и тайны сокровенные и страшные Дня Судного разумеваеши.
Святый праведный воине Феодоре, моли Бога о нас.
О,
воине Феодоре! Помози нам молитвами своими и укрепи на брань супротив зверя, из моря исходяща, силу змея древняго имуща и престол сатаны содержаща и область велию, да не поклонимся ему, ниже послужим.
Вси святии земли Воронежския, молите Бога о нас:
Вси в песнех духовных воспоим согласно/ во благочестии просиявшия Божественныя отцы наша,/ яже изнесе земля Воронежская/ и яже Церковь Русская воспита.
Вси святии земли Воронежския, молите Бога о нас:
О
гнем испытаний искусившеся,/ и сластьми не прельстившеся/ радуетеся честнии,/ престолу Владычню световидному предстояще,/ славнии собори святых на небесех.
Вси святии земли Воронежския, молите Бога о нас:
О
велиции сродницы наша,/ Небеснаго Сиона достигши/ и велию славу от Бога приимшии,/ утешение нам, в скорби сущим, испросите,/ страну нашу в благочестии утвердите/ и люди расточенныя соберите,/ от нас, яко дар, песнь благодарения приемлюще.
Богородичен: На месте озлобления немощи смирившагося, Дево, исцели,/ из нездрaвия во здрaвие претворяющи.
Светилен:
Подобен: Н
ебо звездами:
В песнех восхвалим светила незаходимая земли Ворнежския, таинники Божественного Слова, Христа славяще, сих просветившаго и возлюбившаго, и помощники нам давшаго в скорби. Дважды
Слава, и ныне, Богородичен:
О Дево Благодатная, грады и веси наша честнаго лика Твоего изображении, яко благоволения знамении, обогатившая, благодарение наше приими и от бед лютых отечество наше избави, ведуще бо Тя, яко Покров всемощный страны нашея, величаем.
На хвалитех стихиры святых на 4, глас 4:
Дал еси знамение боящимся Тебе, Господи,/ Крест Твой честный,/ имже тии, посрамивше начала тьмы и власти,/ на земли Воронежстей православие утвердиша./ Темже Твое человеколюбное смотрение славим,/ Иисусе всесильне,// Спасе душ наших. Дважды
Глас 5.
П
риидите, Небеснии предстателие наши к нам,/ вашего требующим милостивнаго посещения,/ и избавите озлобленныя мучительскими прещении/ лютаго неистовства неверных,/ от нихже, яко пленницы и нази, гонимы есмы,/ от места на место часто преходяще и заблуждающе в вертепех и горах./ Ущедрите убо, прехвальнии, и даруйте нам ослабу,/ утолите бурю и угасите еже на ны негодование,/ Бога моляще,// подающего вами земли нашей велию милость.
Глас 6.
Все отложивше житейское томление/ и сладость текущую презревше,/ крест взясте, яко иго Божественное,/ и Христу последовасте, и к Небесному покою чудно вселистеся./ О друзи Христови, сосуди честнии,/ святии вси, в Воронежской земле просиявшии,/ приидите посреде нас невидимо,/ предначинающе торжество и пение/ и сподобляюще даров невещественных// ваш праздник совершающих светолепно.
Слава, глас 5:
Радуйтеся, земли воронежския украшение,/ Церкве нашея непоколебимое утверждение,/ славо православных, чудес источницы,/ любве струи неистощимыя,/ светильницы многосветлии, Духа Святаго органи,/ кротцыи и незлобивии, добродетельми украшеннии,/ человецы небеснии, земнии ангели,/ Христа друзи искреннии!/ Того прилежно молите// подати вас чтущим велию милость.
И ныне, Богородичен, глас тойже:
Присно земля воронежская о Тебе хвалится и веселится,/ имущи Тя заступницу непостыдную/ и стену нерушимую,/ не оскудей и ныне, Владычице,// избавляти Твоя люди от всех бед.
Славословие великое.
По трисвятом, тропарь святых, глас 6:
Под покровом Пресвятыя Богородицы,/ ниспосланнии нам духовнии стражи: / вси воронежстии святии, / приснии наши со святыми Митрофаном, Тихоном и Антонием заступницы: / новомученицы и исповедницы Христовы, / преподобнии боголюбцы и блаженный подвижницы, / в подвизех за Христа, чудесех и страданиих/ землю Русскую от царствующих град до Азова осиявшии, / Христа Бога молите о стране нашей Православней// и о всех соборно вас почитающих.
Слава и ныне, Богородичен воскресный, глас тойже.
Ектении, и отпуст.
На Литургии
Блаженны святых, песнь 3-я — 4 (без ирмоса) и 6-я песнь — 4
Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых.
Апостол ко Евреям, зач. 330.
Аллилуиа, глас 4:
Терпя потерпех Господа и внят ми, и услыша молитву мою. Стих: Многи скорби праведным, и от всех их избавит я Господь.
Евангелие от Матфея, зач. 11.
Причастен: Р
адуйтеся праведнии:
Молитва Воронежским святым.
О всеславнии богопроповедницы и угодницы Христови, святителие и исповедницы, преподобнии и мученицы, иже в земли воронежстей просиявши, и Церковь Христову прославльшии, десницею Всевышняго насаждении, и в предивных селениих Отца Небесного ныне почивающии: пред иконою всечестною вашею молящееся, соборную память всех святых края воронежскаго и земель ему богопричтенных празднующее, со умилением припадаем пред ликом вашим всесиятельным, и молим вы: милостию, юже стяжали есте пред Господем, испросите нам у престола Живоначальныя Троицы оставления грехов и богатыя милости. Да просветятся вси людие, верно почитающии всесвятую память вашу, светом добродетельнаго и всесмиреннаго жития, и сиянием подвигов и чудес ваших: да низпослет Господь нам мир и благоденствие людем земли сея и всему Отечеству нашему христианскому, да утверждается и процветает в нем православие. На заступление Ваше уповающе мы святоотеческаго покрова просим, яко, маловерных нас сущих, верою сквозе мрак века неверия осияваете, и яко страстьми нас обуреваемых безстрастию Христову научаете. Темже навыкохом к вам прибегати, скорым целителем и окормителем, и небесным стражем, заступником и защитником в мори житейстем пребывающым: в вас бо, вси святи наши благодетелие, богоразумию сподобляемся и заповедех Христовых соблюдаемся. О велиции угодницы и святителие Божии: столпе веры и первопрестольниче бооспасаемаго града Воронежа Митрофане: чудотворче Задонский и златословесниче Тихоне: третие светило благодати земли нашея, святителю Антоние, духовный собрате предивному саровскому старцу Серафиму! Возмолитеся со всеми святыми собора угодников Христовых ко Господу нашему Всемилостивому, да дарует всем верным чадом Его дух братолюбия и кротости, миролюбия и смирения, во еже не преткнутися нам грешным о соблазны диаволи, ниже преступити словес Евангельских, и темже да сподобит нас покаяния всесмиреннаго, ни да отступит от нас недостойных милостию Своею, во еже и нам востати во время подобно одесную престола Вседержителева, идеже и вы, всеблазии заступницы наши, предстоите, и вкупе со ангельскими силами воспеваете Животворящую Троицу, в Нейже Отца, и Сына, и Святаго Духа ныне, и присно, и во веки веков: Аминь.

Источник: http://ustavschik.livejournal.com/112984.html