?

Log in

No account? Create an account

sobor_voronezh


О Соборе Воронежских святых


Previous Entry Share Next Entry
Служба всем святым в земле Воронежской просеявшим (первая часть)
sobor_voronezh



Месяца сентября в 4 (17) день
Служба
Собору Воронежских святых

На Велицей вечерни
Б
лажен муж, 1-й антифон.
На Г
осподи воззвах, стихиры святых на 8, глас 3. Самогласны:
Приидите, сущия в земли нашей святыя восхвалим:/ преподобныя, и иерархи,/ мученики и священномученики,/ вкупе именуемыя и неименуемыя,/ сии бо воистинну делы и словесы,/ предивнымным житием, и от Бога дарованьми/ соделашася земли Воронежстей светильницы,/ лучами святости мглу безбожия истощающии,/ ихже и гробы Бог чудесы прославил еси,/ и в небесных чертозех вселил еси,/ и нам сей лик божественный в заступление даровал еси,/ сего ради овы молятся прилежно,// о верою и любовию совершающих светлое их торжество. Дважды
Приидите, православия любителие,/ песньми и пении похвалим богомудрыя святители Воронежския,/ Христовы Церкве светлое украшение,/ священства венцы, благочестия правило,/ источники Божественных исцелений неисчерпаемыя,/ обителие дарований духовных,/ реки чудес полноводнии, землю Воронежскую веселящии течении,/ благоверным людем теплыя пособники,/ ихже ради Христе Боже/ врагов возношения низложи,// имеяй велию милость. Дважды
З
емля веселится и Небо радуется,/ отцы святии, восхваляюще подвиги и труды ваша./ Духовная ваша крепость и ума чистота,/ законом бо естества не победистеся./ О соборе святый и полче Божественный,// земли нашея утверждение ты еси воистинну.
Ины стихиры, глас 8. Самогласны:
Мученицы Христовы преблаженнии,/ на вольное заколение сами себе предаете,/ и землю Воронежскую кровьми вашими освятисте,/ и воздух просветисте вашим преставлением;/ ныне же вы купно на Небесех пребываете,/ во свете невечернем,// о нас всегда молитися, боговидцы. Дважды
С
вятых память велие торжество/ явися земли нашей,/ и, о том хвалящеся, возглаголем:/ не забудите вашея земли,/ но всех нас поминайте,/ совершающих память вашу,// вси святии, молящеся о нас ко Господу.
Слава, глас 1:
Веселися о Господе, земле Воронежская,/ радуйся и ликуй, верою светло одеявшися,/ телеса подвижников веры/ и свидетелей истины в недрех своих имущи, яко сокровище,/ насладися чудес, от них истекающих,/ и, видящи полк сей святый,/ от видимых и невидимых врагов тя ограждающий,/ благодарно Спасу возопий:// Господи, слава Тебе.
И ныне, Богородичен, глас тойже: Всемирную славу:
Вход. Прокимен дне и чтения три.
Пророчества Исаиина чтение (глава 49:8-15):
Тако глаголет Господь: во время приятное послушах тя и в день спасения помогах тебе. И создах тя и дах тя в завет языков, еже устроити землю и наследити наследие пустыни. Глаголюща сущим во узах: изыдите! И сущим во тьме: открыйтеся! На всех путех пастися будут, и на всех стезях пажить их. Не взалчут, ниже вжаждут, ниже поразит их зной, ниже солнце, но Милуяй их утешит я и сквозе источники вод проведет я. И положу всякую гору в путь и всякую стезю в паству их. Се сии издалеча приидут, сии от севера и моря, инии же от земли Персския. Да веселятся Небеса, и радуется земля, да отрыгнут горы веселие и холми правду, яко помилова Бог люди Своя и смиренныя людей утеши. Речe же Сион: остави мя Господь, и Бог забы мя. Еда забудет жена отроча свое? или не помилует исчадия чрева своего? Аще ли же и сих забудет жена, но Аз не забуду тебе, — глаголет Господь.
Премудрости Иисуса, сына Сирахова, чтение (глава 44:1-14):
Восхвалим убо мужи славны и отцы наша в бытии. Многу славу созда Господь в них величием Своим от века. Господствующе в царствиих своих и мужи, именити силою, советующе разумом своим, провещавшии во пророчествах; старейшины людий в советех и в разуме писания людий. Премудрая словеса в наказании их; ищуще гласа мусикийска и поведающе повести во писаниих, мужи богатии, обдаровани крепостию, мирно живуще в жилищих своих. Вси и в родех прославлени быша, и во днех их похвала. Суть от них иже оставиша имя, еже поведати хвалы. И суть, ихже несть памяти, и погибоша, яко несущии, и быша яко не бывше, и чада их по них. Но сии мужие милостивии, ихже правды не забвены быша, с семенем их пребудет доброе наследие, изчадия в заветех. Остася семя их и чада их по них, до века пребудет семя их, и слава не потребится. Телеса их в мире погребена быша, а имена их живут в роды. Премудрость их поведят людие, и похвалу их исповесть Церковь.
Премудрости Соломоновы чтение (глава 3:1-9):
Праведных души в руце Божией, и не прикоснется их мука. Непщевани быша во очесех безумных умрети. И вменися озлобление исход их. И еже от нас шествие — сокрушение, они же суть в мире. Ибо пред лицем человеческим ащe и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я, и во время посещения их возсияют и, яко искры по стеблию, потекут. Судят языком и обладают людьми, и воцарится Господь в них во веки. Надеющиися Нань уразумеют истину, и вернии в любви пребудут Ему. Яко благодать и милость в преподобных Его и посещение во избранных Его.
На литии стихиры святых. Самогласен, глас 8:
Срадуйтеся с нами,/ вси лицы святых и вся ангельская чиноначалия,/ духовно совокупльшеся,/ приидем и воспоим благодарную песнь Христу Богу:/ се бо безчисленный сонм сродников наших предстоит Царю Славы/ и молебно ходатайствует о нас./ Сии суть столпи и красота веры православныя;/ сии учении, и делы, и кровей излиянии Церковь Божию прославиша;/ сии от всех предел земли нашея возсияша,/ и веру православную в ней чудесы и знамении утвердиша, апостольски ревнующе;/ инии же пустыни и грады обительми святыми украсиша,/ ангельское житие показующе;/ мнози ругании, и ранами, и лютою смертию от сынов века сего искусишася,/ мнози же и иными подвиги, во всяком чине подвизавшеся,/ нам терпения и злострадания образ подаша,/ ныне же вси вкупе молят Господа:// от бед избавитися земли нашей и всем нам спастися.
Слава, и ныне, глас тойже, Богородичен, Самогласен:
Срадуйтеся с нами,/ умная чиноначалия, в духовный совокупльшеся лик,/ видяще Царицу и Владычицу всех,/ многоименне верными славиму:/ радуются же дуси праведных, сущии зрителие видения,/ яко на воздусе Сия молебно простирающе всечетнии Свои руцы,/ просит умирения миру,/ земли Воронежстей утверждения,// и спасения душ наших.
На литии в молитве Спаси, Боже: поминаем возможно полный список воронежских святых, также и предстоятель в молитве Владыко, Многомилостиве.
На стиховне стихиры, глас 2.
Подобен: Доме Евфрафов:
Земле Русская, граде святый, украшай твой дом, в немже Божественный велий сонм святых прослави.
Стих: Господи, Господь наш, яко чудно Имя Твое по всей земли.
Земле Русская, красуйся и ликуй, се бо чада твоя Престолу Владычню во славе предстоят, радующеся.
Стих: Святым, иже суть на земли Его, удиви Господь вся хотения Своя в них.
Соборе святых русских, полче Божественный, молитеся ко Господу о земном отечестве вашем и о почитающих вас любовию.
Слава, глас и подобен тойже:
Н
овый доме Евфрафов, уделе избранный, Русь Святая, храни веру православную, в нейже тебе утверждение.
И ныне, Богородичен, глас 8.
Подобен: О,
преславнаго чудесе:
О, преславнаго чудесе! Небесе и земли Царица, от святых сродников нашиx умоляемая, до ныне землю Русскую покрывает и лика Своего изображении милостивно обогащает. О Владычице Державная! Не престани и на будущее время во утверждение на земли Воронежстей православия милости и чудеса изливати до века.
На благословении хлебов:
Тропарь святых, глас 6:
Под покровом Пресвятыя Богородицы,/ ниспосланнии нам духовнии стражи:/ вси воронежстии святии,/ приснии наши со святыми Митрофаном, Тихоном и Антонием заступницы:/ новомученицы и исповедницы Христовы,/ преподобнии боголюбцы и блаженный подвижницы,/ в подвизех за Христа, чудесех и страданиих/ землю Русскую от царствующих град до Азова осиявшии,/ Христа Бога молите о стране нашей Православней// и о всех соборно вас почитающих. Дважды
Богородице Дево: единожды.

В связи с ограничением максимального рамера поста в ЖЖ, утреню и литургию выложены отдельно

Источник: http://ustavschik.livejournal.com/112854.html