?

Log in

No account? Create an account

sobor_voronezh


О Соборе Воронежских святых


Previous Entry Share Next Entry
Служба священномученику Петру (Звереву) архиепископу Воронежскому (+1929). Часть 1.
sobor_voronezh
Месяца ианнуария в 25-й день
Месяца иуния в 4-й день
СЛУЖБА
Священномученику Петру, архиепископу Воронежскому, новомученику Соловецкому.
Благодатию Божиею совершаем Всенощное Бдение.
НА ВЕЛИЦЕЙ ВЕЧЕРНИ

Блажен муж, 1-й антифон.
На Г
осподи воззвах, стихиры на 8, глас 4-й:
Приидите, хвалу воздадим Господеви Богу нашему, / днесь бо память святителя его воспевается, / служителя верна, пастыря непорочна, / исповедника и мученика Христова тверда: / той бо слово Господне соблюд, вся до конца за того претерпе, / церкви российстей и обители соловецтей славу нетленную сотворив. / ныне же мощи святыя твоя лобызающе, Петре, / умиленно молитву к тебе простираем: / огради нас от всякия злыя напасти всесильным твоим заступлением, // испроси нам у Господа велию милость.
От младенства познав Христа, богоблаженне, / волю свою тому навеки предаде, / на камени заповедей его вся созидая: / темже и ты камень веры Христовы явися, / якоже первоверховный апостол Господень, / на немже той церковь свою утверди. / молися, архиереею Божий, не оскудети вере нашей, // и церкви православной не ослабети во веки.
Ты рекл еси, премудре Петре, / яко греси мои предо мною суть выну: / победитель же грехом явился еси, / оружием Божиим на вражия ополчения вооружився, / безстрастия и святости достигл еси, богоблаженне. / помози нам, грехи тяжкими обремененным, / скорбьми лютыми уязвляемым, / совлещися ветхости Адамовы, // украсити души наша добродетельми Христовыми.
Защитителю церкве православныя, / народа русскаго скорбьми отягчаваемаго, утешителю, / в час лютых испытаний твердо исповедал еси Христа, / священномучениче славне Петре; / заступи и ныне всесильною молитвою твоею к Богу / многоскорбных сотечественник твоих, / утеши страждущия души наша, / и от раздирания и расхищения волками хищными // святыню церкве русския благонадежно огради.

Ины стихиры, глас 5-й:

Божественней службе зело прилежа, священнодействителю, / со благоговением велиим предстоял еси престолу Господню, / о мире всем жертву благоприятну Богу принося; / молитвою твоею благомощною укротити прещение Божие, / праведно на землю русскую движимое, умоляял еси, / на милость к падшим созданием своим Господа приклоняяя. / испроси, молитвенниче боголюбезный, / стране российстей на враги видимыя и невидимыя одоление, / людем покаяние всецелое, / разуму нашему просветление // и душам вечное спасение.
Пастырь добрый стаду Христову явился еси, Отче Петре, / на пажити добродетелей Евангельских воспитуя души Божия; / слышан бо тобою трищи бысть сладчайший глас Небеснаго Владыки; / паси овцы моя, паси избранныя моя. / Радостию внимая Божественным глаголом, / ревностно пасл еси тыя, святителю, // о коемждо овчати болезнуя душею боголюбно.
В мире скорбни будете, рече Господь, / предрекая, яко не вкусив скорбей века сего, / не имамы имети радости небесныя; / сие воистину на тебе исполнися, священномучениче, / яко скорби многия о Господе, яже претерпел еси в житии твоем, / в радость вечную души твоей преложишася. / испроси, страстотерпче, и нам силу вся за Христа претерпети, // и тем спасение душам стяжати.
Молитва пламенная святыни сердца твоего подобаше, досточудне, / силу и крепость ти содевающи, / мудрость духу твоему творящи, / любовь Божественную дарующи. / молитвою всесильною твоею, Отче, / изрядных дел творитель был еси; / молением Небесным твоим ныне // вся ко спасению благопотребная нам испроси.

Слава, глас 2:
Подобен: Е
гда от древа:

Церковь православную / от поругания и раздирания ревностно хранил еси, святителю, / отечеству твоему, кровьми сынов и дщерей его умерщвляемому, / верен до конца явися: / на всяком месте идеже бо служение твое / совершал еси, достоблаженне, / вся вдохновлял еси животворящими дыхании проповедания Христова, / сердце исполнено страдания и любве людем простирая: / мнозем бо градом и весем / священноначалие твое ко утверждению во истине послужило есть, / темже и отоком Соловецким, кровию праведною истекшим, / в нихже венец мученический чудному житию твоему сплетен бысть, // архипастырь наречеся.

И ныне, богородичен, глас тойже:

Прейде сень законная, / благодати пришедши: / якоже бо купина не сгараше опляема, / тако Дева родила еси, / и Дева пребыла еси. / Вместо столпа огненнаго, / праведное возсия солнце: / вместо Моисея, Христос, // спасение душ наших.

Вход. Прокимен дне. И чтения.

Премудрости Соломоновы чтение:
П
раведник аще постигнет скончатися…
Премудрости Соломоновы чтение:
П
охваляемому праведнику, возвеселятся людие…
Премудрости Соломоновы чтение:
П
раведных душы в руце Божией…

На литии стихира храма, и священномученику, глас 7:

Богослова изящнаго песньми восхвалим, / священнотайнаго служителя Христова: / той бо песнь поя душею своему Владыце, / пламень сердца изливал есть в поучениих огненных, / возжигая души верою, / собирая стадо Божие, неверием расхищено. / Пастырскою властию твоею собери, святителю, / паству нашу расточенную, // и врагов, смущающих ю, прогони силою Божественнаго Духа.
Властьми безбожными свободы внешния лишенный, / свободою духовною во истине Христове обладал еси, святителю: / осуждение приявый судом неправедным и беззаконным, / в вышних оправдание обрел еси, блаженне. / Дерзновение велие имея ко своему Владыце, / нас оправданием Господним научи, избранниче Христов: / да во истинных путех ходити тщащеся, // того благоутробием всемилостивно оправдимся.

Слава, глас 1-й.
Подобен: Н
ебесных чинов:

Дарованней ти пристолов приседящей премудрости, / исполнение любве и смысла Божия стяжал еси, боголюбезне, / устнама праведныма и сердцем непорочным исповедуя Христа: / воздыхании неизглаголанными Духа непрестанно обновляяся, / право правил еси слово истины, / силу вражию безстрашно сокрушая. / На спасения стези настави нас, святителю, // в Царство Божие премудро нас управи.

И ныне, богородичен, глас тойже.

Небесных чинов радование, / на земли человеков крепкое предстательство, / Пречистая Дево, / спаси ны, иже к тебе прибегающия: / яко на тя упование // по Бозе, Богородице, возложихом.

На стиховне стихиры, глас 1-й:

Крещением Христовым со апостолы крестивыйся, / и чашу страданий по словеси Господню, якоже тии испивый, / венцем нетленным со оными увенчася, архипастырю, / достойно приял еси небесную славу, // и слава российския церкве явися.

Стих: Священницы Твои облекутся в правду, / и преподобнии Твои возрадуются.
Высоту святительскую высотою мученичества удвоивый, / исповедничества красотою из тьмы нам возсиявый, / победивый силу вражию именем смерти победителя, / себе не пощаде ради живущаго во веки: / тем вечнаго блаженства от Того сподобился еси, // достоблаженне Петре.
Стих: Честна пред Господем / смерть преподобных Его.
О славе Фаворстей незаходимей Духом пламенея, / Голгофы Господни образ в сердце присно носил еси, страстотерпче: / в Голгофе Анзерстей кончину мученическую прияти сподобился еси. / священною твоею кровию спасительную жертву Христову прослави, // и кровию агнчею убели ризы своя.

Слава, глас 8-й.
Подобен: О
преславнаго чудесе!

Образ Тивериады апостольския / пред очима внутреннима присно имел еси, святителю, / глаголы испытующия Господни: любиши ли мя, Петре; / в таинниках сердца благоговейно хранил еси: / глаголами сими к подвигом веры воздвизаемь бысть, / ревностию велиею по Бозе распалаяся. / упаси души наша, пастырю святый, / да не погубят их хищныя страсти, // и от Господа да не отлучат во веки.

И ныне, богородичен, глас тойже:

Безневестная Дево, / яже Бога неизреченно заченши плотию, / Мати Бога вышняго, / твоих рабов мольбы прими, Всенепорочная, / всем подающи очищение прегрешений: / ныне наша моления приемлющи, // моли спастися всем нам.

На благословении хлебов:
Тропарь, глас 4-й:

Верою пламенною апостолу Петру подобяся, / таже и трикратным слышанием воззвания Христова, / душу твою за Того положил еси, святителю отче Петре, / каменю твердый Церкве православныя: / светильниче во мраце беззаконий добродетельми сияяй, / радостию страдания за Христа претерпети изволил еси, / со исповедники и страстотерпцы российскими. Молися с ними о нас, архиерею Божий, // священномучениче Соловецкий.

Ин тропарь, глас тойже:

Добрый пастырю и строгий исполнителю заповедей Божиих, / ревнителю благочестия и столпе утверждения, / священномучениче Петре, / пребывая во отоце Анзерстем, /в годину лютых гонений не убоялся еси исповедати веру Христову, / и претерпел еси даже до смерти. / Ныне же, яко имея дерзновение и предстоя Престолу Господню, / моли Христа Бога // спастися душам нашим.

И Богородице Дево: единожды

А идеже несть бдения, по Ныне отпущаеши, и по трисвятом, тропарь: Верою праменною: единожды. Слава, и ныне, Богородичен: Еже от века утаеное:

НА УТРЕНИ

На Бог Господь, тропарь святого дважды. Слава, ин тропарь святого. И ныне, Богородичен.

По 1-й стихологии седален, глас 3-й:

Сердцу зрящу твоему невидимую Божества тайну, / и разумеющу Иисусовых глаголов мудрость, / в Дусе Святе истину Христову проповедал еси людем, отче Петре, / проникая внутренняя человеков огненными словесы, / в пламене души твоея раждающимися: / се бо дар апостольскаго благовестия в тебе явися чудне, // Царству Божию вещанному тобою бывшу велегласно. Дважды.

Слава, и ныне, Богородичен, глас тойже:

Немолчная уста апостолом, / сила духовная святителем, / Марие, Мати Божия, / всякой души труждающейся Богу, предстательнице благодатная: / немотствование нечувственных душ наших разреши, / благоуханием Божественнаго Духа исполняя, / да от сердца избывающа молитвенными воздыхании, // устнама радости хвалу Господню возвещаем неустанно.

По 2-й стихологии седален, глас 8-й:

Душу свою не приял еси всуе, святителю, / николиже в беззакония руце свои простирая, / свят житием твоим явися, преподобне: / тем и жертва твоя свята Богу бысть, / иже от горы краниевы прияв ю непорочну, // в гору божественную свою возведе тя, в приосененныя чащи Небесныя славы. Дважды.

Слава, и ныне, Богородичен, глас тойже:

Печалей утоление, / скорбей отгнание явилася еси, Владычице Пречистая, / радости Небесныя неложное обетование, / печаль и скорбь земную святителя Петра навеки утолившая, / во область радости приснотекущия того приявшая: / печали моея души всещедрою добротою Твоею утоли, молю Тя: / нашествия творящих ей болезнь избави, // и в целости Божественнаго смысла сохрани.

Величание: Величаем тя, / священномучениче Петре, / и чтим святую память твою: / ты бо молиши о нас // Христа Бога нашего.
Ино величание: Величаем тя, / священномучениче Петре, / и чтим честная страдания твоя, // яже за Христа претерпел еси.

Избранный Псалом:

Услышите сия вси языцы, внушите вси жувущии по вселенней. / Уста моя возглаголют премудрость, и поучение сердца моего разум. / Приидите, чада, послушайте мене, страху Господню научу вас. / Благовестих правду в Церкви велицей. / Истину твою и спасение твое рех. / Повем имя твое братии моей, посреде Церкве воспою тя. / Услышати ми глас хвалы твоея, и поведати вся чудеса твоя. / Господи, возлюбих благолепие дому твоего, и место селения славы Твоея. / Возненавидех церковь лукавнующих, и с нечестивыми не сяду. / Яко сохраних пути Господни, и не нечествовах от Бога моего. / Уста праведнаго поучатся премудрости, и язык Его возглаголет суд. / Правда Его пребывает в век века. / Священницы Твои облекутся правдою, и преподобнии Твои возрадуются. / Блажени живущии в дому Твоем, в веки веков восхвалят тя.
Слава, и ныне: Аллилуиа, трижды.

По полиелеи седален, глас 8-й:

Христа распятаго единем Господом и Богом исповедуя, / во внутренних души твоея сей образ свято соблюдал еси, священномучениче Петре. / До часа смертнаго Креста твоего не оставляя, страстотерпче, / вменися яко агнец заколения, / вся побеждая силою возлюбльшаго тебе: / за многия неправды праведеный пострада, / Голгофы Анзерския новое свещение // и похвала высокая явися. Дважды.

Слава, и ныне, Богородичен, глас тойже:

Край земли российския избрала есть, Богородице Марие, / безмолвнаго отока Анзерскаго благословенную пустыню, / усмотрив ю жертвенник благоуханен / во исполнение преднаречений завещавшаго Свой завет о жертвах. / Сопричащающися тайне Превечнаго Совета Божия, / дню страшнаго суда зарю возсияваеши, / благословляя жертву праведную совершающуся за свидетельство возлюбленнаго Сына Твоего, // жертвоположника и жизнодателя Христа Господня.

Степенна, 1-й антифон 4-го гласа.

Прокимен, глас 4-й: Возвеселится Праведник о Господе, / и уповает на Него. Стих: Услыши, Боже, глас мой, внегда молити ми ся к Тебе. Всякое дыхание: Евангелие от Луки, зачало 67.

По 50-м псалме стихира, глас 6-й:

Из глубины взывал еси ко Господу, священномучениче: / готово сердце мое, Боже, готово сердце мое, / по воли Твоей сотвори со мною. / Сего ради благодатию в Тебе животворящею / не себе живяше, отче, но Владыце и Творцу твоему, / вся ко спасению стада Христова мудрствуя и дея. / Моли, яко Престолу славы ныне предстоиши, преподобне, / Божественною милостию избранных части нам сподобитися, // мзду верных восприяти в день праведнаго воздаяния.